Ferill 432. máls. Aðrar útgáfur af skjalinu: PDF - Word Perfect.
154. löggjafarþing 2023–2024.
Þingskjal 573 — 432. mál.
Svar
heilbrigðisráðherra við fyrirspurn frá Bjarkeyju Olsen Gunnarsdóttur um kæfisvefnsrannsóknir á Sjúkrahúsinu á Akureyri.
1. Hvað er hægt að framkvæma margar kæfisvefnsrannsóknir í senn á Sjúkrahúsinu á Akureyri (SAk) annars vegar og Landspítala hins vegar og hvað var greitt fyrir margar slíkar rannsóknir á ári hverju síðastliðin fimm ár á hvorri stofnun fyrir sig?
Sjúkrahúsið á Akureyri (SAk) er með þrjú tæki til að framkvæma kæfisvefnsrannsóknir og með því að fullnýta tækið þá er hægt að framkvæma 15 rannsóknir á viku. Sjúkratryggingar eru með samning við SAk um 200 kæfisvefnsrannsóknir á ári en sjúkrahúsið áætlar að raunhæft sé að framkvæma um 600 rannsóknir á ári.
Á Landspítala, eða undir umsjón hans, er unnt að gera allt að 18 kæfisvefnsskimanir á dag, þar af geta allt að 6 skimanir farið fram utan Landspítala á einhverri samstarfsstofnana spítalans (sjá svar við 2. tölul. fyrirspurnarinnar). Að auki er unnt að gera 4–5 svefnrannsóknir með heilariti (PSG-mælingar) á dag, sem eru umfangsmeiri og ítarlegri rannsóknir sem einungis er hægt að gera á Landspítala.
Fjölda kæfisvefnsskimana og PSG-mælinga sem gerður var á ári hverju sl. 5 ár á Landspítala má sjá í eftirfarandi töflu:
Tegund | 2018 | 2019 | 2020 | 2021 | 2022 |
Kæfisvefnsskimun | 1.330 | 1551 | 1.322 | 1.573 | 1.501 |
PSG rannsókn (svefnrannsókn m. heilriti) | 130 | 137 | 121 | 388 | 509 |
Alls | 1.460 | 1.688 | 1.443 | 1.961 | 2.010 |
Fjölda kæfisvefnsrannsókna sem gerðar voru á ári hverju sl. 5 ár á Sjúkrahúsinu á Akureyri má sjá í eftirfarandi töflu:
2018 | 2019 | 2020 | 2021 | 2022 |
291 | 308 | 280 | 330 | 404 |
2. Hvaða stofnanir framkvæma kæfisvefnsrannsóknir?
Þær stofnanir og/eða þeir aðilar sem framkvæma kæfisvefnsrannsóknir eru:
– Landspítali
– Sjúkrahúsið á Akureyri
Landspítali hefur síðan eftirlit með kæfisvefnsskimunum sem framkvæmdar eru á eftirfarandi stofnunum:
– Heilbrigðisstofnun Suðurnesja í Keflavík
– Heilbrigðisstofnun Vestfjarða á Ísafirði
– Heilbrigðisstofnun Vesturlands á Akranesi
– Heilsugæslu höfuðborgarsvæðisins (Mosfellsbæ, Hamraborg Kóp., Efra-Breiðholti og Seltjarnarnesi)
– Heilbrigðisstofnun Suðurlands í Vestmanneyjum
– Heilbrigðisstofnun Suðurlands á Höfn í Hornafirði
– Heilbrigðisstofnun Austurlands á Egilsstöðum
– Heilbrigðisstofnun Austurlands í Neskaupstað
Aðrar opinberar stofnanir sem framkvæma kæfisvefnsskimanir og mælingar eru:
– Sjúkrahúsið á Akureyri
– Heilbrigðisstofnun Suðurlands á Selfossi
Þar fyrir utan eru framkvæmdar kæfisvefnsskimanir á eftirtöldum stöðum:
– Læknasetrinu í Reykjavík
– Reykjalundi í Mosfellsbæ
– Hjartamiðstöðinni í Reykjavík
Þess má og geta að Háskólinn í Reykjavík og Háskóli Íslands eru báðir með rannsóknarverkefni yfirstandandi sem tengjast svefnrannsóknum og kæfisvefni þar sem gerðar eru kæfisvefnsskimanir og PSG-mælingar í tengslum við kæfisvefn.
3. Hversu margir einstaklingar fara á Landspítala af upptökusvæði SAk í kæfisvefnsrannsóknir?
Í eftirfarandi töflu má sjá fjölda einstaklinga frá póstnúmerum 5- og 600 (Norðurland) sem hafa komið í kæfisvefnsskimun og/eða PSG-mælingu á Landspítala á ári sl. 5 ár.
Fjöldi rannsókna alls sem búsettir eru á Norðurlandi | 2018 | 2019 | 2020 | 2021 | 2022 |
Kæfisvefnsskimun | 17 | 18 | 6 | 8 | 10 |
PSG-rannsókn (svefnrannsókn m. heilriti) | 2 | 4 | 4 | 6 | 16 |
Alls | 19 | 22 | 10 | 14 | 26 |
Þess má geta að tölur í þessu svari snúa að greiningarfasa kæfisvefns, hér er um skimun að ræða og því endurspegla þessar tölur ekki heildarumfang þeirrar þjónustu sem fylgir þeim sem greinast með og fá meðferð við kæfisvefni. Sem dæmi má nefna að árið 2022 var 661 einstaklingur á meðferðarlista svefndeildar Landspítala frá póstnúmerum 500–699 og áttu þeir 1.659 komur sem tengdust þeirri meðferð það árið. Um getur verið að ræða allt frá innstillingu nýrrar meðferðar, eftirlit (þ.m.t. rafrænt eftirlit), endurnýjun/stillingu á búnaði o.fl. sem fylgir meðferð við kæfisvefni.
4. Hversu hár er kostnaður Sjúkratrygginga Íslands vegna þeirra sem fara á Landspítala en gætu annars farið á SAk?
Í upplýsingakerfi Sjúkratrygginga Íslands er ástæða ferðar og greiðsla ferðakostnaðar skráð í textasvæði og því er ekki hægt að nálgast upplýsingar með einfaldri gagnakeyrslu. Jafnframt er óheimilt að samkeyra klínísk gögn frá Landspítala við upplýsingar um greiðslu ferðakostnaðar frá Sjúkratryggingum Íslands samkvæmt lögum um persónuvernd.
Hins vegar er rétt að taka fram að komið hefur verið til móts við óskir Sjúkrahússins á Akureyri um viðbætur við samning um kæfisvefnsskimanir á undanförnum árum svo ólíklegt er að íbúar á upptökusvæði Sjúkrahússins á Akureyri hafi þurft að ferðast til Reykjavíkur einungis vegna kæfisvefnsskimunar.
5. Má gera ráð fyrir því að kostnaður einstaklings á upptökusvæði SAk sem fer í kæfisvefnsrannsókn á Landspítala sé meiri en ef viðkomandi fengi þjónustu á SAk? Ef svo er, hversu miklu munar í kostnaði?
Kæfisvefnsskimanir þeirra einstaklinga sem eiga flóknari sjúkdómssögu eða í þörf á nákvæmari greiningu þarf að framkvæma á Landspítala. Ef hins vegar er um að ræða sambærilega kæfisvefnsrannsókn og gerð er á Sjúkrahúsinu á Akureyri má ganga út frá því að kostnaður einstaklings við það að sækja þjónustuna til Reykjavíkur verði meiri.